Бөлүмдөр
Шаршемби, 20-ноябрь
Чүй облусуПанфилов району 23.10.2019 17:42

Панфиловдогу Курама айыл аймагында 57 км жерге суу түтүктөрү орнотулду

Turmush -  Чүй облусунун Панфилов районундагы Курама айыл аймагынын калкын таза суу менен камсыздоодо 57 чакырым жерге суу түтүктөрү коюлду. Бул тууралуу жергиликтүү тургундар аймактык кабарчыга маалымдады.

Алардын айтымында, райондун курамын Курама, Вознесеновка, Чалдыбар, Фрунзе, Орто айыл аймактары жана Кайыңды шаары түзөт. Анда көп улуттуу 45 896 адам жашайт.

Өз карамагына 20 айылды жана бир шаарды камтыган райондун тургундары айыл жана мал чарбасы менен алектенишет.

«Айыл өкмөттүн курамындагы Панфилов, Эфиронос, Жайылма, Күрпүлдөк, Орто-Арык айылдарында 2,4 миңден ашуун түтүндө көп улуттуу 12 миң адам жашайт. Учурда атайын долбоор менен 170 млн сомдук каражат жумшалып, магистралдык трассанын 57 чакырымына суу түтүктөрү коюлуп, 8700 адам таза суу менен камсыздалды. Жергиликтүү тургундар жашоо шартын жакшыртуу максатында короосуна жана үй ичине суу киргизишкен», - деди айыл өкмөттүн башчысы Бакыт Эсенаманов.

Анын оюн Панфилов районунун 47 жаштагы тургуну Перизат Кулунова колдойт.

«Айылыбызда таза суу ишке киргени көптөгөн элет көйгөйүн чечти. Корообузда, үй ичинде таза суу менен камсыз болдук. Каалаган учурда пайдаланууга жакшы шарттар түзүлдү. Президент өзү айылыбызга келип, таза суу боюнча көйгөй менен таанышып кеткен. Панфилов районундагы эл менен жолугушуусунда таза суу программасы боюнча бир топ иш-аракеттер болуп жатканын да белгилеген», - деди ал.

Ошондой эле мектептердеги дени сак баланы тарбиялоо, ысык тамак уюштурууда таза суу менен камсыз болуу шарттардын жакшырганына негиз болгонун А.Осмонов атындагы орто мектебинин директору Назира Нуркалиева айтат.

«Жаңы окуу жылынан баштап мектебибиз таза суу менен камсыз болду. Ал тамактануу маселесиндеги бир топ көйгөйлөрдү чечти. Дени сак балдарды өстүрүүгө толук шарттар түзүлдү. Бул Аймактарды өнүктүрүү жана өлкөнү санариптештирүү жылындагы олуттуу кадамдардын бири болду», - деди.

50 жаштагы жергиликтүү тургун Таалай Кошоев да өз оюн айтты.

«Мен бул тармакты жакшы билем. Айрым жерлерге суу түтүктөрү жаңы коюлган. Ошондо жашоочуларга суу түтүгү тазалангыча ылай аралашкан кир суу барышы мүмкүн. Качан гана суу агып, түтүктү тазалагандан кийин кадимкидей таза суу чыга баштайт», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×