Turmush — Жети-Өгүз районунун Кабак айылынын 33 жаштагы тургуну Ырысгүл Шадыканова кол өнөрчүлүк менен алектенип, киреше таап жатат. Ал Turmush басылмасынын кабарчысы менен болгон маегинде кантип кол өнөрчүлүккө кызыгып калганын айтып берди.
Ырысгүл Шадыканова 1991-жылы Түп районуна караштуу Сары-Булуң айылда төрөлгөн. 10 жылдай Бишкек шаарында тигүү тармагында иштеген.
«Учурда айылда жашаганыма байланышту дорожка (килемче) тигип, интернет аркылуу сатып келем. Дорожка тигип баштаганыма 6 ай болду. Кол өнөрчүлүккө бала кезимен бери кызыгам. Турсункан, Бурул деген эжелерим иштүү болгон, алардан таасир алдым. Калганы өзүмдүн жөндөмдүүлүгүмөн окшойт. Тюрбан, жоолук, понама, шоппер сумкаларды да тигем.
Өзүм тиккен дорожканы үйдүн кире беришке салып койгом. Келген коноктор аябай мактап, «кантип тебелеп өтөбүз?» дешти. Ошондо менде ой пайда болуп, дорожка тигип, интернетке киргиздим. Ошентип кардарлар келе башташты.
Өзүм үчүнда керектүү нерселеримди тигип алам. Учурда онлайн киреше табуунун жолдору өтө көп. Өз колумдан жаралган буюмдарды сатып, киреше табуудамын. Бир күндө 4 дорожка жасайм. 1х1 метрлик дорожкалар 1350 сом, 80х80 сантиметрликтер 1000 сомго бааланат. Кол эмгекти баалагандар үчүн баасы ушундай.
Мындан сырткары үй жумуштары менен алектенем. Жайкысын бакчабызга жашылча-жер жемиштерди өстүрөбүз. Азырынча кичиней кеңсеме шарт түзүп жатам. Аз убакыттын ичинде кардарларым арты артынан келип жатат. Ошондой эле гүл өстүргондү жакшы көрөм. Апам, жолдошум болуп чогуу турабыз. Алдыда курс ачуу пландап жатам. Менин тикендеримди көрүп, үйрөнүү каалагандар көп болуп жатат», - деди каарманыбыз.