Бөлүмдөр
Жума, 24-январь
Чүй облусуКемин району 10.01.2020 22:00

«Апам жаза албаса, анан эмне кылалы?»: 1-класстагы окуучунун мугалим Н.Бексултановага берген жообу

Назик Бексултанова
Назик Бексултанова

Turmush -  Чүй облусунун Кемин районуна караштуу Кучумбай Шаболотов атындагы Кара-Булак орто мектебинде башталгыч класстын мугалими болуп иштеген Назик Бексултанова 13 жылдан бери билим берүү тармагында эмгектенип келет. Аны менен аймактык кабарчы таанышты.

Каарманыбыз Кемин районунда 1987-жылы жарык дүйнөгө келген.

«Кеминдеги №1 орто мектепти аяктап, Кыргыз билим берүү академиясын 2007-жылы бүтүргөм. Анда башталгыч билим берүүнүн теориясы жана методикасы бөлүмүнөн билим алгам. Ушул эле жылы эмгек жолум башталды», - деди ал.

Назик Бексултанова жумуш үстүндөгү башталгыч класстын окуучулары менен болгон кызыктуу окуяларынан да айтып берди.

«Башталгыч класстарга сабак өткөндүктөн кызыктуу окуялар абдан көп болот. Ичинде кири жок, баёо кыял жеткинчектер көӊүлүӊдү дайыма көтөрүп турат. Жакында эле 6 жаштагы окуучулардан: "Жакшы адамдар кандай болуш керек?" деп сурадым. Бир окуучум тура калып: "Кичинекей балдарды жакшы жактарга, парктарга, оюндарга алып барган, бизге керектүү нерселерди, шоколад, сок, оюнчуктарды сатып берген адамдар — жакшы адамдар" деп жооп берип, аябай күлдүргөн. Дагы бир жолу бир окуучумдун кол жазмасы сулуу болуп, өзүнүкүнө окшошпой калыптыр. Дароо эле чоӊ киши жардам берип, жазганын билип калдым. Ал окуучудан: «Ким жазып берди? Бул сенин кол жазмаң эмес» десем, «эжем жазып берди» деди. «Эмнеге эжеӊ жазып берет?» деп, андан ары «өзүӊ жазбайсыӊбы» деп айтайын деп жаткам. Ал дароо «апам жаза албаса, анан эмне кылалы?» деди. Бир чети күлкүм келди.

Башталгыч класстарда сүйүү, сүйүп калуу жок, бирок жактырып калышса жашырышпайт. "Мени бул кыз же бала менен отургузуӊузчу" деп ачык эле айтышат. Биз бир карап эле бүт түшүнөт эмеспизби. Жактыруу болуп калса, бири-бирине жардам беришип, чогуу ойношот. Жактырган кызы келбей калса, «эмнеге келбей калды?» деп сурап турушат.

Ар бир окуучум бир нерсени үйрөнгөн сайын сүйүнөм, толкунданып, жүзүмө жылмаюу пайда болот. Ошондон эргүү алам десем да жаңылышпайм. Мугалимге окуучулар өздөрү эле стимул берип турушат. Биз дагы ар тараптан өзүбүздү тарбиялап, билим алып, изденип турабыз. Анткени биз балдарга үлгү экенибизди билебиз», - деди жаш мугалим.

Ал үй-бүлөлүү, 3 уулдун апасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×