Бөлүмдөр
Жекшемби, 15-декабрь
Чүй облусу, Кара-Балта 25.11.2019 09:56

Сүрөт — 14 жаштагы Алтынай Кара-Балтадагы жалгыз боксчу

Turmush -  14 жаштагы Алтынай Осмонакунова бокс менен машыккан Кара-Балта шаарындагы жалгыз спортчу. Бул тууралуу СССР спортунун чебери, машыктыруучу Александр Макаров Turmush басылмасынын кабарчысы менен болгон маегинде билдирди.

Анын айтымында, Алтынай бокско келгенге чейин спорт менен машыккан эмес. Жаңы келгенде көнүгүүлөрдү аткарууда кыйналган. Азыр физикалык жактан жакшырып, салмак таштап, тулку бою келишимдүү болуп калды.

«Аялдардын боксу олимпиадалык спортко кирерин белгилеп коюу керек. Эки олимпиада өттү, биздин өлкө катышкан жок. Кээ бир кыздар келишет, бир аз машыккан соң таштап салышат. Ага ата-энесинин каршы болгону же өзүнүн кызыгуусу тарап кеткени себеп болот. Кыргызстан кыздардын боксу менен эл аралык аренага чыкса, ийгиликке жетишет деп ойлойм. Анткени бизде атаандаштык жок. Аялдардын боксу Казакстан, Өзбекстан, Тажикстан, Моңголия, Филиппинде жакшы өнүккөн. Биздин өлкө деле олимпиадалык оюндарга спортчу кыздарды даярдай алат деп ишенем», - деди машыктыруучу Александр Макаров.

Алтынайды бул спортко атасы алып келген. Апасы дагы колдоого алган. Машыгуу акысыз жүргүзүлөт. Ал эми ар бир соккунун техникасын үйрөнүү үчүн убакыт керек. Аларды өздөштүргөн соң гана каршылашы менен рингге чыгып машыгат. Бирок учурда ага каршылаш табуу кыйын болууда.

«Алтынайдын чоң атасы бокс менен машыкчу. Мен жаш кезимде күрөш менен машыккам. Бокс кыздарга тийиштүү спорт эмес деп эсептебейм. Азыр коом өзгөрүп, кыздар оор атлетика жана эрежесиз эр уруш менен дагы машыгып жатышат. Биз Антонина Шевченко жана Айсулуу Тыныбекова менен сыймыктанабыз. Спорттун башка түрүнөн чемпион кыздар чыгып жаткандан кийин боксчу кыздарды дагы тарбиялай алабыз деп ойлойм. Алтынайдын буга мүмкүнчүлүктөрү бар, ал физикалык жактан күчтүү. Эң негизгиси өзүнүн каалоосу бар.

Бокс кыздардын спорту эмес дегендерге түшүнбөйм. Тескерисинче бокс менен машыккан кыздар денесин түз кармап, сымбаттуу болуп калышат. Анткени дененин конституциясы жакшы жакка өзгөрөт. Чындыгында кыздар эркектерге караганда чыдамдуу келишет, аларда өзүн сактоо инстинкти жакшы өнүккөн. Менин кызым бул спорттон ырахат алат. Мындан тышкары стадиондо жүгүрөт. Жакында бассейн ачылса ага дагы жазылабыз. Биз сөзсүз түрдө турнирлерге катышабыз», - деди Алтынайдын атасы Алмаз Мамедов.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×