Бөлүмдөр
Бейшемби, 25-апрель
Чүй облусу, КЕмин 17.01.2019 17:21

Айыл турмушу: К.Бейшеналиев жайлоодо элдин малын багып, киреше табат (сүрөт)

Turmush -  Канат Бейшеналиев 1972-жылы Кемин районунун Чым-Коргон айыл өкмөтүндө төрөлгөн. Ал бала кезинен мал чарбачылык менен өскөн. Учурда жаз мезгилинен баштап күзгө чейин өзүнүн жана элдин малын алып, жайлоого үй-бүлөсү менен чыгат. Аймактык кабарчы аны менен таанышты.

«Мал чарбачылыкка кичинекей кезден аралаштык. Атам колхоз мезгилинде мал бакчу. Ошого байланыштуу союз учурунда жана андан кийин деле кой чарбасында көп жүрдүк. Азыркы убакта шартка жараша жылкы, уй, кой багам. Бирок кымбат баалуу асыл тукум мал-жандыктарды азырынча бага элекмин. Кадимки эле өзүбүздүн кыргыз мал чарбасын кармайм. Өзүбүзгө жетиштүү, чакан. Мындан сырткары жазында өзүмдүн малым менен чогуу кошуна-колоӊдун, туугандардын жана башкалардын малдарын алып, жайлоого үй-бүлөбүз менен чыгабыз. Бир койду 50 сом, жылкыны 500-600 сом, бодо малды 400 сомдон ай сайын акы алып багып беребиз. Бул баа шартка жараша болот. Жаздан кеч күзгө чейин жайлоодо болобуз. Айылдагы элдер, дыйкандар түшүмдөрүн жыйнап алгандан кийин түшөбүз. Күн жылуу болсо март айында, жаан-чачын болсо кечирээк чыгып калабыз», - деди ал.

Канат Бейшеналиев мал чарбанын да айтып бүткүс түйшүгү бар экенин баса белгиледи.

«Мал баккан деле оӊой эмес. Багып көргөн адам билет. Кээ бирөөлөр малды жайып, жайлоодо жыргап чалкалап жатат деп ойлошот. Жайлоодо күн ачык болсо айлана керемет, жаан-чачын, туман болсо бизге кыйын. Андайда мал дагы көп жоголот. Бааны арзандатып карап бербейт дегендер да болот. Өзүӊөр билгендей мал бир жерде турбайт. Туманда таппай каласыӊ. Кээде жоголгон малды жумалап издейбиз. Элдин малын алгандан кийин жоопкерчилик деген болот. Таппай калсак уурдадыбы, эмне болду деп сарсанаа болобуз. Кошуна-колоӊго телефон чалып сурай коёбуз. Кээде бири-бирибизге кошулуп кеткен болот. Эч жерден таппай калсак, ээсине айтабыз. Алар дагы келип, издешет. Кудайга шүгүр, кандай жумуш болбосун, анын сөзсүз түйшүгү бар. Келечекте ушул кыргыздын мал чарбасын өнүктүрүүгө өз салымымды кошкум келет», - деди ал.

Канат мырза үй-бүлөлүү, 4 баланын атасы.

«Бир кыз, үч уулум бар. Кызым турмушка чыккан, уулум үйлөнөм деп жатат. Экинчи уулум 10-класста, көкүрөк күчүгүбүз 3-класста окуйт. Келинчегим Мирайым үйдө, мага жардам берет. Ал менден кийинки эле инимдин классташы, Он Бир-Жылга айылынан болот.

Классташтары болуп отурушкан экен, ошол жерден таанышып калгам. Келинчегим жакшы, баарын орду-орду менен жасап, мага арка-жөлөк болуп, балдарыма жакшы тарбия берип, үй жайды таза жана тыкан кармайт. Мактагандай эле», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×