Бөлүмдөр
Дүйшөмбү, 19-август
Чүй облусу, Кара-Балта 24.08.2015 15:59

Кара-Балта менен Кытайдын Куйтунь шаарынын ортосунда соода-экономикалык мамилелерди өнүктүрүү меморандуму түзүлдү (фото)

Turmush -  Бүгүн, 24-августта Чүй облусундагы Кара-Балта шаарына Кытайдын Куйтунь шаарынын мэри Кайрат Асикар иш сапары менен келди. Бул тууралуу Кара-Балта шаардык мэриясынын басма сөз кызматынан Turmush басылмасынын кабарчысына маалымдашты.

Жолугушууда Кара-Балта шаарынын мэринин милдетин аткаруучу Эмил Орозбаков, мэриянын бир катар бөлүм башчылары жана Куйтунь шаарынын мэри Кайрат Асикар эки тараптуу соода-экономикалык кызматташуу тууралуу сүйлөшүштү.

«Кыргызстан эгемендик алгандан кийин кыргыз-кытай кызматташтыгын жүргүзүүчү ыңгайлуу аймак болуп калды. Биздин Куйтунь шаары Кара-Балта шаарына окшош. Эки шаар тең чакан болгону менен ишканалар көп. Эң чоң айырмачылык Куйтунда Кара-Балта шаарынын жашоочуларынан 5 эсе көп эл жашайт. Биз бул жерде соода иштерин өнүктүрүүгө кызыктарбыз. Бизде Орто Азияга курулуш каражаттарын, унаа тетиктерин, эмерек жана темир буюмдарды жасап таратуучу эң чоң ишканалар бар», - деди Хайрат Асикар.

Өз кезинде Кара-Балта шаардык мэриясынын бөлүм башчылары жашылча-жемиштерди кайра иштетүүчү цех ачууга жана электр кубатын үнөмдөөчү лампаларды, күндүн нурунан дүрмөттөлчү батареяларды чыгарган ишканаларды ачууга кызыктар экендиктерин билдиришти.

Кытай тарап билдиргендей, эки тарап тең соода-экономикалык иштерди өнүктүрүүгө даяр жана шарты ылайыктуу. Өзгөчө Кара-Балта шаарынын Жибек жолунда жайгашкандыгы, ал аркылуу Ош, Бишкек шаарлары байланыша турганы сооданын жакшы жүрүшүнө өбөлгө болот.

«Тарыхка көңүл бура турган болсок Кыргызстан менен Кытай ар дайым ынтымактуу коңшулук мамилени сактап келген. Жакында Кара-Балта шаарында жалпы аянты 100 гектар жерге эркин экономикалык аймак курулат. Шаарда кытай товарлары гана сатылбастан, өзүбүз да ишканаларды иштетип, өндүрүштү өнүктүрүүгө аракеттенебиз. Кытай Эл Республикасынан келген өнөктөштөр туризмди өнүктүрүүү тармагына да кызыга турганын айтышты», - деди Э.Орозбаков.

Ал кошумчалагандай, 2 шаардын соода-экономикалык кызматташтыгы боюнча меморандум түзүлдү. 26-августта Ысык-Көл облусунда өткөрүлө турган экономикалык форумда кол коюлат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×